Liboreiro Blues

Teño predilección por eses libros que conseguen capturar un instante, unha etapa, un pasado, e facelo con verbas que somerxen ao lector/a nunha atmósfera atrapante. Iso mesmo é o que fai Salvador Rodríguez Pastoriza, xornalista buenense director de Suplementos en Faro de Vigo, e que propón na obra Liboreiro Blues un xogo co máis bonito de Bueu e Cangas,  dous municipios da comarca do Morrazo aos que el se sentiu desde sempre moi apegado.

O libro que teño entre mans  consta de pequenos capítulos que máis ben son recordos enlatados, que fan que se poidan ler independentemente, e coñecer máis da historia de Bueu, das súas rúas, das súas xentes, das súas tabernas, das súas praias, dos seus edificios, e da infancia e adolescencia do autor que se sente orgulloso se pisar por esta terra e pasar os grandes anos da súa vida.

Salvador Rodríguez fainos pensar e valorar o que temos, que non é pouco. É un libro que mestura o galego co castelán, que nace de conversas, de momentos aparentemente banais, unha técnica que empregan os mellores mestres da literatura. Semella que en moitas ocasións queremos botar a vista atrás e deixar sobre o papel os nosos recordos, para que estes non se esvaezan.

Liboreiro Blues ten un título que nos leva inevitablemente a recordar Tokio Blues do nipón Haruki Murakami, e nese sentido, atopamos a similitude da nostalxia como creadora de literatura, de historias de emocionan.

Ficha técnica

Título: Liboreiro Blues

Autor: Salvador Rodríguez Pastoriza

Editorial: Bueu Edicións

Ano de publicación: 2015

Número de páxinas: 90