Cuestionario Proust: Luz Beloso, pintora, ilustradora e profesora de debuxo

Licenciada en Belas Artes pola Universidade de Salamanca na especialidade de pintura, Luz Beloso é pintora , ilustradora e profesora de debuxo, e participou en numerosas exposicións nacionais e internacionais. A súa forma de entender a ilustración é transversal e os seus debuxos forman parte de moitas historias literarias, sobre todo infantís e xuvenís.

De entre os últimos proxectos nos que participou destaca Unha folla vermella, un álbum ilustrado de edición numerada e limitada no que fai, xunto aos textos de Miguel Ángel Alonso Diz, unha reflexión crítica sobre o proceso de creación. Outros libros actuais ilustrados por ela son O enigma do baúl pechado, de Xosé Antonio Neira Cruz, Non te amola!, de Xela Arias, A fuga de Guillermo, de Helena Villar Janeiro, e H2… oh! Pingas científicas, de María Canosa.

Coñecémola mellor neste Cuestionario Proust:

1. O principal trazo do teu carácter? A perseveranza.
2. Que cualidade aprecias máis nun home? A transparencia , a humildade e a empatía.
3. E nunha muller? Exactamente o mesmo.
4. Que agardas das túas amizades? Nada.
5. O teu principal defecto? Ansiosa.
6. A túa ocupación favorita? Debuxar.
7. O teu ideal de felicidade? Estar en paz comigo mesma e compartir tempo coa xente que quero.
8. Cal sería a túa maior desgraza? Non poder remediar o sufrimento das persoas ás que quero.
9. Que che gustaría ser? Luke Skywalker.
10. En que país desexarías vivir? No que vivo.
11. A túa cor favorita? Case verde, case azul ; PANTONE  325 U.
12. A flor que máis che gusta? A papoula.
13. Que paxaro prefires? Os que se achegan á miña xanela pola mañá.
14. Os teus autores/as favoritos en prosa? Ana María Matute.
15. E poetas? Gloria Fuertes.
16. Un heroe de ficción? O principiño.
17. Una heroína? Matilda.
18. O teu músico ou música favorito/a? Angelo Badalamenti.
19. O teu pintor ou pintora preferido/a? Xaime Quessada.
20. O teu heroe ou heroína na vida real? O meu pai , a miña nai e Juan Sicilia.
21. O teu nome favorito? “Bina” que provén de Balbina.
22. Que hábito alleo non soportas? O de apagar o cigarro na area da praia deixando a cabicha enterrada.
23. Que é o que máis detestas? Non durmir  e a carne crúa.
24. Unha figura histórica que che poña mal corpo? As dos opresores.
25. Un feito histórico que admires? Os logros históricos relacionados coa loita feminista.
26. Que virtude desexarías posuír? Forza de vontade para facer  deporte.
27. Como che gustaría morrer? Canto máis tarde mellor e sen decatarme.
28. Cal é o estado máis común do teu ánimo? Variable,  loitando por ver o lado positivo das cousas .
29. Que defectos che inspiran maior indulxencia? Os da inocencia.
30. Tes unha máxima ou lema de vida? Non son moito de lemas , pero gústame esta frase de Joseph  Beuys  “Non estou para decorar este sistema podrecido, senón para facer unha revolución”.