Moitas veces nos preguntamos os porqués da escolla dunha determinada profesión, dun camiño concreto no noso devagar día a día, pero en moi poucas ocasións atopamos unha resposta. No libro Dende o conflito, co que a escritora e tradutora galega María Reimóndez gañou en 2014 o Premio Xerais de Novela, atopamos os porqués de Saínza Combarro, xornalista de guerra para a BBC. Ela pregúntase se o xornalismo de guerra serve para algo, se escoller esta profesión axuda ás persoas, de que forma afecta na súa vida persoal…
Aínda que esteamos diante dunha novela que combina ideas e sentimentos dunha xornalista de conflitos, que sufre na súa propia pel as consecuencias da escolla desta profesión (soidade, perda de contactos, renuncia a manter unha relación estable e trastornos psicolóxicos por ver tanta maldade e guerras), tamén nos presenta os seus recordos, a busca da súa vida no pasado e, máis concretamente, na infancia.
Da man da protagonista viaxamos polo Congo, Irak, Etipía, afganistán, Sri Lanka, Haití, eses lugares do conflito; pero tamén a Barcelona, Berlín, Compostela e Vilalba, onde busca a calma, o sosego, a tranquilidade tras pasar tempo na guerra.
María Reimóndez é consciente tamén de que a literatura e xornalismo se deben mirar con ollos de muller, xa que foron moitas as que ao longo do tempo se adentraron en países problemáticos para contar:
«E entón mirou cara ao ceo e viu a lúa grande, a lúa que se vía en todos os recunchos do planeta, que brillaba en calquera escuridade. E comprendeu que o único que fixera era aquilo para o que viñera. Contar».
Dende o conflito é tamén unha homenaxe patente a todas AS XORNALISTAS , de guerra ou non, que fixeron o mesmo traballo cós homes pero que nunca foron tratadas igualmente. Atopamos aquí citas sobre xornalismo de Sofía Casanova, Marta Gellhorn , Marie Colvin ou Lara Logan. Unhas mulleres que creron no xornalismo, e loitaron por ser consideradas á marxe do home. Reimóndez non esquece na súa literatura a visibilidade da muller.
Os continuos debates sobre o obxectivismo e a imparcialidade no xornalismo tampouco se esquecen nesta novela. Os xornalistas de guerra describen as situacións baseándose nas súas experiencias coas persoas e polo tanto afástanse desa imparcialidade que, por outro lado, constitúe unha lacra para a comprensión real dos feitos.
«Se ía contar, quería facelo dende as persoas, fosen estas quen fosen. Dende as súas vidas, dende o seu medo e dende o seu perigo, non dende un lugar aséptico».
Ficha técnica
Título: Dende o conflito
Autora: María Reimóndez
Editorial: Xerais
Ano de publicación: 2014
Número de páxinas: 297
Lecturafilia 