Luca Chao (Lugo, 1988) é licenciada en Ciencias Políticas, especialista en Migracións Internacionais e doutora en Ciencias Sociais e do Comportamento cunha tese sobre a Lei da Memoria Histórica e a participación política dos descendentes do exilio republicano español.
Na X lexislatura do Parlamento de Galicia foi deputada e voceira do seu grupo parlamentario. Traballou como investigadora e docente, nas Universidades da Coruña e Santiago, e colaborou en numerosos proxectos de investigación centrados en cuestións vinculadas coa participación política, as migracións internacionais e o xénero.
Actualmente exerce labores de consultaría para o sector público e colabora con medios como Nós Diario e Público. Tamén publicou o libro de divulgación feminista Feminismo en cen palabras.
Coñecémola mellor neste Cuestionario Proust:
1. O principal trazo do teu carácter? A firmeza.
2. Que calidade aprecias máis nun home? A lealdade.
3. E nunha muller? A mesma.
4. Que agardas das túas amizades? Tempo.
5. O teu principal defecto? A dureza.
6. A túa ocupación favorita? Viaxar.
7. O teu ideal de felicidade? Un libro ao sol na Illa de Arousa.
8. Cal sería a túa maior desgraza? Perder o amor das persoas que quero.
9. Que che gustaría ser? Libre.
10. En que país desexarías vivir? Neste.
11. A túa cor favorita? A amarela.
12. A flor que máis che gusta? As hortensias.
13. Que paxaro prefires? Lamento non saber nada de paxaros.
14. Os teus autores/as favoritos en prosa? Vai por épocas. Nesta podería dicir Berta Dávila, Brenda Navarro e Amelie Nothomb.
15. E poetas? Son unha mala lectora de poesía, do último que me emocionou teño que citar a García Montero.
16. Un heroe de ficción? Sei menos de heroes que de paxaros.
17. Unha heroína? E de heroínas seguramente menos aínda.
18. O teu músico ou música favorito/a? Sabinera ao meu pesar.
19. O teu pintor ou pintora preferido/a? Frida Kahlo.
20. O teu heroe ou heroína na vida real? Calquera persoa que se compromete ata mancharse.
21. O teu nome favorito? Carmela.
22. Que hábito alleo non soportas? A mentira.
23. Que é o que máis detestas? A falta de lealdade e a equidistancia.
24. Unha figura histórica que che poña mal corpo? Resúltame difícil escoller a un único fascista.
25. Un feito histórico que admires? O goberno da Fronte Popular na II república española.
26. Que virtude desexarías posuír? A flexibilidade.
27. Como che gustaría morrer? Amando.
28. Cal é o estado máis común do teu ánimo? A ledicia.
29. Que defectos che inspiran maior indulxencia? Seguro que os meus.
30. Tes unha máxima ou lema de vida? A vida é hoxe.
Descubre más desde Lecturafilia
Suscríbete y recibe las últimas entradas en tu correo electrónico.
Lecturafilia 