María Reimóndez naceu en Lugo e é tradutora e intérprete de profesión. Como escritora ten cultivado case todos os xéneros, como a poesía, a novela e o ensaio. Traballadora incansábel a prol da igualdade, Reimóndez defende unha sociedade feminista, que é algo que levan sempre intrínsecos os seus múltiples libros, de entre os que destacan O club da calceta, En vías de extinción, Fóra do normal, Corredora, Cobiza, ou A semente, a árbore e a froita.
Reimóndez tamén forma parte da plataforma de crítica literaria feminista A Sega, dende a que leva a cabo moitas iniciativas que teñen que ver coa visibilidade das autoras do pasado e do presente.
Coñecémola mellor neste Cuestionario Proust:
- O principal trazo do teu carácter? A determinación.
- Que calidade aprecias máis nun home? Non fago distinción nas calidades das persoas segundo o seu xénero. Agardo das persoas en xeral que sexan honestas.
- E nunha muller?
- Que agardas das túas amizades? A súa presenza, que sería o mesmo que dicir «todo». Exactamente o mesmo que eu procuro ofrecer a quen está na miña vida.
- O teu principal defecto? A esixencia.
- A túa ocupación favorita? Cada cousa no seu momento pero diría que, en solitario, saír correr, ler, calcetar, escribir e facer NADA e, en compaña, boxear e, noutro plano de interacción, charlar coas persoas que me importan.
- O teu ideal de felicidade? A coherencia.
- Cal sería a túa maior desgraza? Perder a esperanza.
- Que che gustaría ser? Coherente.
- En que país desexarías vivir? Neste, pero con máis persoas orgullosas a construír un futuro diferente dende a lingua, o territorio e a empatía crítica.
- A túa cor favorita? O lilá.
- A flor que máis che gusta? Gústanme as árbores moito máis ca as flores. Os acivros, porque resisten.
- Que paxaro prefires? Os que voan libres.
- Os teus autores/as favoritos en prosa? A lista é moi longa. Sen dúbida, Susana Sánchez Aríns, Eva Mejuto, Salma, Akwaeke Emezi, Ninotchka Rosca, Katherena Vermette…
- E poetas? Outra lista enorme. Marta Dacosta, Thamizhachi Thangapandian, Sukirtharani. Tishani Doshi…
- Un heroe de ficción?
- Unha heroína? Non fago categorías de xénero neste sentido nin me gusta o concepto dos heroes e das heroínas. Na ficción quedaríame coa transgresora Berti Bartolotti, creada pola singular Christine Nöstlinger.
- O teu músico ou música favorito/a? En xeral son moito de funky. Algunhas que sempre están son Prince, Janelle Monáe, Jamiroquai e Judith Hill. E por suposto Mercedes Peón, que para min é moito máis ca unha música, é unha pensadora, un fenómeno da natureza e unha das miñas amigas máis queridas.
- O teu pintor ou pintora preferido/a? Artemisa Gentilleschi e Margaret Keane, polo que pintan diante e detrás do lenzo.
- O teu heroe ou heroína na vida real? Para min as heroicas son as persoas que se erguen no cotián contra a inxustiza e, nese sentido e de maneira sobranceira creo que a miña maior referente na vida foi a miña mai, a persoa máis rebelde que coñecín, coa maior intelixencia emocional posible.
- O teu nome favorito? O que as persoas escollen para si.
- Que hábito alleo non soportas? Fumar.
- Que é o que máis detestas? A mesquindade e a superficialidade.
- Unha figura histórica que che poña mal corpo? A lista é demasiado longa. Creo que a historia adoita estar mal contada porque se presentan como exemplares señores que distan moito de selo.
- Un feito histórico que admires? O voto das mulleres.
- Que virtude desexarías posuír? Dubido que sexa unha virtude pero si que me gustaría ter menos preguiza para todos os asuntos dixitais.
- Como che gustaría morrer? Despois de deixar o mundo algo mellor.
- Cal é o estado máis común do teu ánimo? A calma efervescente. A ira produtiva.
- Que defectos che inspiran maior indulxencia? Os das persoas que quero.
- Tes unha máxima ou lema de vida? Unha man soa non fai música.
Lecturafilia 