A pasada semana celebrei o meu aniversario e entre os moitos agasallos literarios que recibín houbo un moi especial. A persoa que mo deu buscaba un libro especial, non unha novela ao uso. E elixiu Emocionario, un álbum ilustrado para pequen@s e maiores nos que se propón un camiño moi próximo ao sentir real, transitando entre emocións. Defender isto hoxe en día semella unha utopía, non credes?
Emocionario recolle textos de Cristina Núñez Pereira e Rafael R. Valcárcel sobre as diversas emocións que imos experimentando os seres humanos no avance do día e da vida. Acompañan estas emocións as ilustracións de diversos autores e autoras que achegan a súa propia visión e personalidade a un libro de por si xa ben diferente. Adriana Keselman, Alejandra Karageorgiu, Anita Morra, Bela Oviedo, Cynthia Orensztajn, Elissambura, Federico Combi, Gabriela Thiery, Javier González Burgos, Jazmín Varela, Josefina Wolf, Keki un puntito, Luciana Feito, María Lavezzi, Maricel Rodríguez Clark, Nancy Brajer, Nella Gatica, Paola De Gaudio, Patricia Fitti, Romina Biassoni, Tofi e Virginia Piñón, son todas as persoas que están detrás da parte gráfica desta proposta.
Que boísima idea crear un Emocionario nun momento no que semella que os sentimentos se están desbotando, ocultando, o que leva que vivamos somerxidos en sociedades cada vez máis opacas e nas que medra a soidade. Ante este mundo deshumanizado, este libro de emocións preséntase como idóneo para toda a rapazada, xa que nela está o necesario cambio de mentalidade e a defensa dunhas sociedades máis humanas. Un libro que é tamén un boa forma para premer o freo e por un día deixarse levar pola lentitude da calma e do sosego.
Outra cuestión a ter en conta debería ser a idoneidade desta publicación á hora de falar e reflexionar sobre o que sentimos, de identificar emocións e de compartilas e botalas fóra. Contra o individualismo e a soidade, sempre nos quedará a compañía das letras e das persoas que nos queren.
Ficha técnica
Título: Emocionario
Textos: Cristina Núñez Pereira e Rafael R. Valcárcel
Ilustracións: diversos autor@s
Editorial: Palabras Aladas
Ano de publicación: 2016
Número de páxinas: 93
Lecturafilia 
Love it!
Me gustaMe gusta