Xosé Daniel Costas, ou Dani Costas, é un poeta moañés, autor de obras como Infancia de vacas mortas, Monicreques, Conservas ou De costumes e agoiros do Mar do Norte. Membro fundador da Asociación Cultural Lonxa Literaria de Moaña. Activista social e cultural vinculado á vila de Moaña, na actualidade exerce como concelleiro neste municipio da comarca do Morrazo.
Coñecémolo mellor neste Cuestionario Proust:
1. O principal trazo do teu carácter? A timidez.
2. Que cualidade aprecias máis nun home? A sinceridade.
3. E nunha muller? O mesmo.
4. Que agardas das túas amizades? Unha boa conversa e a verdade.
5. O teu principal defecto? Non saber delegar. Estou traballando para evitalo.
6. A túa ocupación favorita? Viaxar e coñecer o motivo das cousas ou polo menos intentalo.
7. O teu ideal de felicidade? Beber unha cervexa tostada mentres falo de literatura, arte, de procesos creativos. Aprender das demais.
8. Cal sería a túa maior desgraza? Non hai mais desgraza que a morte o resto pode amañarse.
9. Que che gustaría ser? O que son.
10. En que país desexarías vivir? En Galiza sen dúbida algunha. E non me cambiaría de lonxitude nin latitude. Moaña é o centro do mar.
11. A túa cor favorita? Verde escuro.
12. A flor que máis che gusta? A da camelia.
13. Que paxaro prefires? Gústanme os paíños. A metáfora de adentrarse no mar e a súa fraxilidade aparente.
14. Os teus autores/as favoritos en prosa? Anxo Rei Ballesteros, Ledicia Costas, Rosa Aneiros e Pedro Feijoo.
15. E poetas? Imposible enumeralos sen deixarme alguén atrás. Así que dígoche Xosé Manuel Millán Otero. Xa que empecei a escribir poesía para intentar expresar o mundo como o lin a través dos seus poemas.
16. Un heroe de ficción? Erno Cernui, personaxe a través da novela Morte de Rei educador de Don García. Ese home que coñecín a través da novela levoume a soños épicos na miña infancia.
17. Unha heroína? Nabiza Girl.
18. O teu músico ou música favorito/a? Xabier Blanco.
19. O teu pintor ou pintora preferido/a? Luis Seoane.
20. O teu heroe ou heroína na vida real? Leticia Santos. Alcaldesa de Moaña.
21. O teu nome favorito? Daniel, o nome do meu avó. Síntome moi afortunado de que me acompañe na vida.
22. Que hábito alleo non soportas? A prepotencia.
23. Que é o que máis detestas? A prevaricación, sen dúbida.
24. Unha figura histórica que che poña mal corpo? Francisco Franco e secuaces.
25. Un feito histórico que admires? A revolución dos cravos.
26. Que virtude desexarías posuír? Ser o mais xusto e ecuánime posible.
27. Como che gustaría morrer? De pé e con esperanza.
28. Cal é o estado máis común do teu ánimo? Son un pesimista informado que nunca deixa de intentalo.
29. Que defectos che inspiran maior indulxencia? A ignorancia.
30. Tes unha máxima ou lema de vida? Na presentación do meu primeiro poemario, Millán Otero díxome: «Nunca lle faltes o respecto á poesía». Alguén o entendeu como unha saída de ton, para min foi a mellor lección do mestre.
Autoría foto do autor: Moisés Magallanes
Descubre más desde Lecturafilia
Suscríbete y recibe las últimas entradas en tu correo electrónico.
Lecturafilia 