Antía Veres Xesto é a responsable de que resoen en galego obras tan fermosas como O deus das pequenas cousas, de Arundhati Roy ou O inimigo coñece o sistema, de Marta Peirano, pero tamén dos libros infantís que compoñen a serie Txano e Óscar, entre outros moitos. Nada en Guitiriz no 1992, esta tradutora xa conta con abondosos premios na súa traxectoria. No 2013 conseguiu o accésit na edición de 2013 do Premio de tradución da Universidade de Vigo pola tradución da obra O conto de Nadal de Auggie Wren, de Paul Auster. No 2017, foi a gañadora do I Premio Realia de Tradución por Detrás da máscara, de Louisa May Alcott. No 2019, gañou o XVIII Premio Plácido Castro pola tradución da obra Unha muller perdida de Willa Cather.
Coñecémola mellor neste Cuestionario Proust:
1. O principal trazo do teu carácter? O agradecemento.
2. Que calidade aprecias máis nun home? Que amose interese: interese polo que lle contas, polo que fai, por coidar a comunidade e o mundo no que vive.
3. E nunha muller? O mesmo.
4. Que agardas das túas amizades? Que, por moito que cambiemos e que muden as nosas circunstancias, non me marchen, que sigan estando aí para facer o que sempre fan con tanta naturalidade: quitarlles ferro ás miñas preocupacións, crer en min máis do que eu o fago, darme pulos, arrincarme mil sorrisos e encherme por dentro coa súa simple presenza, xa sexa física ou virtual.
5. O teu principal defecto? Ser demasiado cadrada nun mundo que tende á esfera.
6. A túa ocupación favorita? Desocuparme para escoitar, observar e tocar a natureza.
7. O teu ideal de felicidade? A infancia.
8. Cal sería a túa maior desgraza? A de calquera nai.
9. Que che gustaría ser? Bióloga.
10. En que país desexarías vivir? Sempre en Galicia.
11. A túa cor favorita? A morada.
12. A flor que máis che gusta? Os pensamentos e as milicrocas.
13. Que paxaro prefires? O paporroibo no outono e no inverno, e o cirrio na primavera e no verán.
14. Os teus autores/as favoritos en prosa? Paul Auster, Arundhati Roy, Isabel Allende, Xosé Luís Méndez Ferrín. Por exemplo.
15. E poetas? Gloria Fuertes, Manuel María, Celso Emilio Ferreiro.
16. Un heroe de ficción? Balbino.
17. Unha heroína? Momo.
18. O teu músico ou música favorito/a? Agustín Barrios Mangoré.
19. O teu pintor ou pintora preferido/a? Un que non penso mencionar por misóxino.
20. O teu heroe ou heroína na vida real? Jane Goodall. E, sobre todo, as mulleres que me criaron.
21. O teu nome favorito? Lía.
22. Que hábito alleo non soportas? O de non falar en voz baixa en situacións que así o requiren.
23. Que é o que máis detestas? A falta de empatía.
24. Unha figura histórica que che poña mal corpo? Os asasinos do crime da Legua Dereita.
25. Un feito histórico que admires? O 8M de 2018.
26. Que virtude desexarías posuír? A da pachorra.
27. Como che gustaría morrer? Durmindo despois dun día festeiro coa familia e coas amizades; así, sen decatarme e co corazón e co bandullo ben cheíños.
28. Cal é o estado máis común do teu ánimo? A preocupación, o que non deixa de preocuparme.
29. Que defectos che inspiran maior indulxencia? A torpeza e os descoidos das persoas despistadas.
30. Tes unha máxima ou lema de vida? Paseniño, faldiña de liño. Dicíamo a miña avoa, pero aínda teño que aprender a aplicalo na vida.
Descubre más desde Lecturafilia
Suscríbete y recibe las últimas entradas en tu correo electrónico.
Lecturafilia 