Cuestionario Proust Rebeca Baceiredo: escritora e filósofa

Rebeca Baceiredo (Ourense, 1979) é licenciada en Ciencias da Comunicación pola USC e doutora en Filosofía con premio extraordinario coa tese «Achegas ontoéticas para a liberación do suxeito. Unha aproximación a partir da filosofía de Gilles Deleuze». Ten un mestrado en Arte Contemporánea e un posgrao en Teoría e Práctica da Interpretación. En 2006 gañou o premio de ensaio Ramón Piñeiro co libro O suxeito posmoderno. Entre a estética e o consumo (2006). Dende entón publicou máis ensaios, nos que mestura sempre a filosofía coa análise sobre o mundo contemporáneo, o que a converte nunha das grandes pensadoras e analistas galegas do presente.

Coñecémola mellor neste Cuestionario Proust:

O principal trazo do teu carácter? Son frontal, para sentirme ben necesito dicir o que penso, o que me parece mal. Aínda que non se vexa así, penso que é o punto de partida para unha ética dialóxica. É certo que o fago sen ambaxes. E espero -ou prefiro- o mesmo.
Que calidade aprecias máis nun home? A honestidade.
E nunha muller? A mesma.
Que agardas das túas amizades? Lealdade.
O teu principal defecto? Esixente. Aparentemente impulsiva (en realidade non é tanto así).
A túa ocupación favorita? Escribir e estudar.
O teu ideal de felicidade? Pasar o maior tempo posible da vida facendo o que me senta ben, o que mantén os meus niveis de enerxía óptimos. Nun entorno igual: nunha sociedade feliz, equilibrada, respectuosa, consciente, comprometida, xenerosa, educada.
Cal sería a túa maior desgraza? A nivel persoal, a perda de seres queridos. Noutro, que podendo vivir nun paraíso insistamos en facelo nun inferno.
Que che gustaría ser? Libre, sabia.
En que país desexarías vivir? Aquí.
A túa cor favorita? Azul Klein. Vermello. Violeta e verde tamén. Pero depende para que.
A flor que máis che gusta? Lirio. Orquídea. Violetas.
Que paxaro prefires? Ibis.
Os teus autores/as favoritos en prosa? Borges, Lispector, Cortázar, Lucía Berlín, Marguerite Duras. Zambrano, Agamben, Bataille.
E poetas? Valente, Anne Carson.
Un heroe de ficción? A resistencia de V.
Unha heroína? A mesma resposta.
O teu músico ou música favorito/a? Damon Albarn.
O teu pintor ou pintora preferido/a? Rothko.
O teu heroe ou heroína na vida real? Angela Davis.
O teu nome favorito? Alicia, Deva, Rebeca. Rivqa.
Que hábito alleo non soportas? A mentira, a impertinencia, a dobrez, a mesquindade.
Que é o que máis detestas? A mala educación e a soberbia, a ignorancia (no sentido socrático).
Unha figura histórica que che poña mal corpo? Calquera dos fascismos ou dos totalitarismos, non só contemporáneos.
Un feito histórico que admires? A loita obreira, as loitas campesiñas, as revoltas de escravos. Calquera proceso de emancipación social, onto-política.
Que virtude desexarías posuír? Sabedoría, que vai con prudencia, pero coa valentía, coa temperanza, co coñecemento e coa autodeterminación.
Como che gustaría morrer? Dixéronme que ía morrer rodeada de libros. Sería unha boa morte, se é de vella e tranquila, practicando a contemplación.
Cal é o estado máis común do teu ánimo? Se estou rodeada de persoas que me baixan a potencia, de mal humor. Se estou rodeada de seres que me soben a potencia, de bo humor, con humor. Cortisol ou oxitocina que dependen da circunstancia: non son moi sabia, logo. Se estou soa, en xeral, tranquila; se estou con outras especies, inocente.
Que defectos che inspiran maior indulxencia? Creo que son bastante indulxente, menos co nomeado arriba.
Tes unha máxima ou lema de vida? Non teño lemas. Quizais tendencias: intentar devir reactiva o menos posible e desenvolverme ontoloxicamente.