Leticia Barbadillo Vázquez (A Coruña, 1983) estudou Comunicación Audiovisual porque quería ser guionista. Hai uns anos, reconduciu a súa carreira cara ao ensino e traballa como mestra de Educación Infantil na escola pública. Nai de tres fillos, participou nos blogs colectivos «Se o vello Simbad tivese fillos» e «Sobre as cousas». A botella de lentellas, Premio Merlín de Literatura 2023, é a súa primeira obra.
Coñecémola mellor neste Cuestionario Proust:
1. O principal trazo do teu carácter? Un equilibrio absurdo entre a teimosía e a inconstancia.
2. Que calidade aprecias máis nun home? Intento que sexa a bondade, pero segue a admirarme a intelixencia.
3. E nunha muller? A impermeabilidade ao patriarcado.
4. Que agardas das túas amizades? Que me deixen acompañalas no divertido e no terrible.
5. O teu principal defecto? O ensimesmamento.
6. A túa ocupación favorita? A desocupación.
7. O teu ideal de felicidade? Como agora, pero sen ter que traballar para vivir.
8. Cal sería a túa maior desgraza? Testemuñar violencia deliberada contra algún dos meus fillos e non poder impedila.
9. Que che gustaría ser? Xa son moitas máis cousas das que imaxinei, pero fascinaríame experimentar o mundo como o micelio dos fungos ou calquera outro organismo colectivo, deslocalizado e lonxevísimo.
10. En que país desexarías vivir? Nunha utopía socialfeminista poliamorosa de clima temperado.
11. A túa cor favorita? Amarelo.
12. A flor que máis che gusta? A camelia branca na árbore.
13. Que paxaro prefires? As pegas que conspiran contra nós no xardín.
14. Os teus autores/as favoritos en prosa? Depende do día, agora mesmo a tope con Irene Solà. De adolescente fun moi de Hesse e de Millás e, despois, de Auster. Cunqueiro, Dahl, Gripe, Ende sempre. Aínda así son máis de obra que de autor.
15. E poetas? Non sei ler poesía, pero con Lucía Aldao á fin do mundo.
16. Un heroe de ficción? O barón rampante.
17. Unha heroína? A Teresa de Jesús de Cristina Morales en Malas Palabras.
18. O teu músico ou música favorito/a? Un grupo: Antónia Font.
19. O teu pintor ou pintora preferido/a? Creo que non teño diso.
20. O teu heroe ou heroína na vida real? Alejandro Calleja e Lucía Lomas, que asumiron o risco de perder a custodia do seu fillo por facer respectar os seus dereitos educativos e dez anos despois seguen nun proceso xudicial para que España cumpra a sentenza da ONU para que eses dereitos queden blindados para as que veñen detrás.
21. O teu nome favorito? Benilde.
22. Que hábito alleo non soportas? Soporto, pero mal, os audios de WhatsApp.
23. Que é o que máis detestas? A crueldade, activa ou pasiva.
24. Unha figura histórica que che poña mal corpo? Netanyahu e todos os que lle deixan facer.
25. Un feito histórico que admires? Todos os de resistencia civil colectiva, especialmente os protagonizados por mulleres ás que a realidade converteu en activistas involuntarias.
26. Que virtude desexarías posuír? Todas as que fan mellor a vida das demais ao estaren comigo, empezando por ser xenuinamente amable.
27. Como che gustaría morrer? Satisfeita, sen dor e sen medo.
28. Cal é o estado máis común do teu ánimo? A preguiza.
29. Que defectos che inspiran maior indulxencia? En xeral calquera que non sexa meu. En particular, teño bastante tolerancia ao rosmonismo e á desorde.
30. Tes unha máxima ou lema de vida? Sigue nadando.
Autor foto: Jorge Martínez Rey
Descubre más desde Lecturafilia
Suscríbete y recibe las últimas entradas en tu correo electrónico.
Lecturafilia 